DIHAHOLONGI DEBATA DO SIRADOTI PATIK DOHOT UHUMNA

1. Pangibulan Psalmen 19, i ma pujipujian tu Debata ala hinadenggan ni PatikNa. Ala hadengganon ni Patik ni Debata, sai marulak-ulak dihatahon par-Psalmen on hatuaon ni halak na mangulahon Patik ni Debata, dohot jea ni na mangalaosi Patik i. Na mangolu jala na marhuaso do Hata ni Debata. Alani manang ise na naeng mangolu, na naeng martua jala na naeng sonang diulahon ma Hata ni Debata. Dihatindanghon par-Psalmen on do di hagogoon ni Hata ni Debata na mangalehon pangurupion. Marungkil jala marsitaonon do ibana ala hasetiaonna mangulahon Patik dohot Hata ni Debata. Alai nang pe songon i, tongtong do dihilala ibana huaso ni Hata i mangurupi ibana. Hata ni Debata na hinangoluhonna i mangalehon petunjuk di sidalananna dohot siulahononna asa boi haluar sian parungkilon dohot sitaononna. Ala ni do didok di Psalmen 119:105 “FirmanMu itu pelita bagi kakiku dan terang bagi jalanku”. 2. Patik ni Debata na hinauashon ni par-Psalmen on mangalehon kemampuan di ibana paholang diri sian hajahaton dohot maminsang na jahat. Diboto ibana do na gale do ia daging, mura diela mangulahon dosa; alani asa margogo ibana paholang diri sian hajahaton dohot asa margogo maminsang na jahat, gabe di hangoluhon ma Hata ni Debata. Holan marhite na manghangoluhon Hata ni Debata do margogo na porsea i maminsang dohot mangalo hajahaton. Ndang margogo pinsang-pinsang ni sada halak molo sipinsangon dope ibana. Ala ni asa margogo hita maminsang hajahaton, parjolo ma hita gabe tiruan diparange na denggan. 3. Mangaradoti Patik ni Debata, lapatanna mangulahon manang ma marangehon lomo ni rohaNa. Mangaradoti Patik ni Debata ndang holan umboto sisiasia ni Patik, alai mangulahon lomo ni rohaNa, jala unduk di parentaNa ala pos roha di hagogoonNa. Niulahon hata ni sada halak ala pos roha di ibana. Songon i do ngolu ni na porsea i maradophon Debata. Di ulahon lomo ni roha ni Debata ala pos rohana di Ibana, ala ni haposan HataNa, ala pinarhatopot sintong do Ibana, jala pinarhatutu dilehon i do hatuaon di ngoluniba. Amen !