MARSURAK MA DITONGATONGANTA DO DEBATA

Sepania 3 : 14 - 20

1.     Sepania lapatanna “Nunga diramoti Jahowa”; nunga ditabunihon Jahowa”. Sada tema na menonjol di buku Sepania on ima Ari ni Jahowa (bnd, 1:14 – Hari Tuhan), ima ari haroro ni Debata laho mandabu uhum ni rimasNa. Ari pangarimason, ari hagogotan dohot pardangolan; ndang adong na boi manahan manang ise pe. Ndang mabiar si Sepania manurirangkon i. Tullom do i dipasahat tu angka raja, penguasa dohot situan natorop. Alai ndang marujung di uhum ianggo ulaon ni Debata. Dipatudu do, tung umbalga do holongNa sian rimasNa. Ai dung rimas uhum i, pintor soluk do bagabaga haluaon sian Debata. I do ala dijouhon Debata marhite si Sepania tu bangso i asa marolopolop, mariaia jala marlas ni roha bangso i. Boasa ? Ala nunga diunsat Jahowa uhumNa na tu Israel (ay.15a). Tutu diuhum Debata do nasida tu habuangan dohot haluaon do sangkap ni Debata. Nunga disiaphon Debata angka musu nasida (ay.15b). Jahowa do marporang humophop bangso i. Jahowa mian ditongatonga nasida, mandongani, jala mangondingi bangso i. Dungi pasuangon ni Debata ma muse hamuliaon nasida (ay.19-20), haurahon nasida i, ala naung ditoru ni huaso ni bangso parbegu i nasida, paubaon ni Debata ma i gabe hamuliaon. Ai mulak ma muse bangso i sian habuangan tu Jerusalem, mamongoti bagas joro i marsomba tu Debata. Ndang idaon nasida be hinamago alai hamuliaon nama. Alani i dijouhon Debata; unang mabiar – unang palenduk tanganmu. Tidak ada lagi yang perlu ditakutkan, bila Tuhan ada di pihak dan ditengahtengah kita

2.     Nuaeng ndada tu Israel be joujouon, alai hita na ma. Mariaia ma ho, marolopolop ma ho, marlas ni roha ma ho, sian nasa roham. Ai na tatagam jala na tapaima haroroNa i, ima Jesus Tuhantai, mangalehon lasni roha, songon na tu Israel on. Alai adong do “syarat” na ingkon ulahononta asa dapot i. Dia ma i? Pauba roha (bertobat). I do joujou ni si Sepania tu bangso i. Sude perubahan i patupaon ni Debata jala boi daion ni bangso i, ima molo olo nasida pauba roha. Didok adong 3 siluluan :

1. Lului ma Jahowa.  Asa tu Jahowa peakhon sude ngolu, Ibana gabe haposanmu, paloas Ibana mangatur sude ngolum, unang laho tu hagogoon na asing, tu sumangot ni ompu, tu hepeng, hasangapon, d.n.a.
2. Lului hatigoran – keadilan; ima maniru Debata na adil, ingkon luluanta, usahahononta, perjuanghononta, asa sude dapotan keadilan. Pungkaonta ma sian dirinta sandiri. Berlaku adil tu sude halak, tu istri/suami, tu ianakkon, tu pegawai, d.n.a. Keadilan akan membuat hidup menjadi aman, damai dan tenteram.
3. Lului haserepon ni roha. Ai holan halak na serep marroha do sipatimboon ni Debata jala holan angka parroha haserepon do topoton ni Jesus na tubu i (BE.No.43:3).