PANARIHONON TU ANGKA NA HUMURANG

I Korint 12 : 21 - 26

1.  “Persatuan dalam keberagaman; kepelbagaian untuk persatuan”. Diigil pandohan on do asa boi marsada tu dongan nang pe marasing budaya, haporseaon dohot bangko. Pinangke parasingan i pasadahon diri tu dongan, unang paholangkon. Ndang soadahonon parasingan i, alai parhaseangkonon do tu ngolu na masitumpahan. Ala marhite parasingan ni ngolu, hadirion dohot bangko I ditogutogu do hita mangantusi panompaon ni Debata di jolma, marasingasing do, asa marhite parasingan i jumpang na masitumpahan (saling melengkapi).

2.  Domu tusi do na pinasahat ni turpuk on. Masa parbolatbolaton di huria Korint ala pengkultusan ni ruas tu angka Apostel i. Ala hurang malo si Paulus marjamita,diparoaroa ibana, asa ganggu natorop di haporseaonna, sabalikna dipatimbo, dikultushon apostel na asing i. Pangkultusan i patubuhon parbolatan di Korint, adong horong Paulus, Kepas, Apollos dohot Kristus. Alani ma dipasahat si Paulus surat on laho paingothon huria Korint taringot tu lapatan ni parasingasingan ni parngoluan ni jolma. Parasingasingan ni ngolu dohot silehonlehon i ndang jadi pangkeon patimbohon diri jala paoruhon dongan. Boasa marasingasing jala marragam dipasahat Tuhan i silehonlehon ditongatonga ni Huria? Asa marpanumpak tu na asing. Dipatudos si Paulus parasingsingan ni silehonlehon i tu parasingasingan ni organ tubuh ni jolma. Sada do pamatang ni jolma alai marragam jala marasingasing organ ni pamatang i, marasingasing nang fungsina. Adong mata, pinggol, dila, tangan, hulinghuling, igung dohot na asing. Nang pe marragam bentuk dohot fungsina, sada do pamghilalaan. Nang pe marasingasing, masirainan do pangontakna. Molo dibereng mata pahean nauli, manigor diparentahon tu roha mandok uli, jala pintor dionjar pamangan manungkun argana, diparenta tangan manjama dohot mambuat hepeng laho manuhor, ima reaksi spontan bersama. Ndang boi ruas ni pamatang i so padohot na asing.

3.  Suman tusi do parngoluon ni jolma. Ndang dos dipasahat Tuhan i silehonlehon dohot ulaon tu jolma, marasing be do, asa jumping parsaoran na masitupahan. Ndang ditompa Debata jolma I dos jala sarupa, ai molo sude pegawai negeri sipil(PNS), ise be mangula hauma na paradehon boras tu pegawai? Hasadaon ni halak Kristen ndada hasadaon sama tinggi, sama rendah, manang sama rata. Hasadaon ni halak Kristen ima hasadaon dalam keberagaman. Bhineka Tunggal Ika : Berbedabeda tetapi satu, satu walaupun berbeda. Hasadaon ni halak Kristen tudos tu “harmoni ni suara”. Nang pe marasing volume ni suara sopran tu alto, tu tenor dohot bas, alai molo dipadomu marhite harmoni tarbege paduan suara na tabo begeon.

4.  Didok si Paulus, ndang boi dohonon ni mata tu tangan: ndang tu dihangku ho. Ndang boi dohonon ni na sada tu na asing: ndang ringkot ho di au. Ndang boi lea roha ni organ na sada tu organ pamatang na humurang idaon. Isarana, ndang boi lea roha ni mata tu imbulu ni mata. Na nidokna ndang jadi lea roha tu dongan jolma. Ndang jadi rajuman tumimbo, umbalga, manang sumangap iba sian na asing. Torop jolma na sala mangantusi di parasingasingan ni silehonlehon i. Adong na mangarajumi tumimbo jala sumurung ibana sian donganna, ala sumurung dijalo silehonlehon sian Tuhan i. Pangalaho na mangarajumi diri sumurung sian na asing i do na mambahen masitombisan jolma di parsaoran jala manghorhon hagaoron.

Ganup ruas dohot parhalado ingkon mangarajumi dirina ruas ni pamatang ni Kristus. Molo jumpang na songon i, ndang adong be pangalaho na marguru dokhu. Antong tapangke ma parasingasingan ni ngolunta i tu ngolu na masitumpahan dohot masiurupan.